KAPISAN LAN PUNGKASAN
Wektu kuwi aku lagi munggah kelas 5. Nalika mlebu kelas, ana murid anyar lanang sing teka saka papan adoh. Nanging murid anyar kuwi ora biyasa. Dheweke duwe cacat awak. Sikile sengkleh siji sing tengen, awake gering, lan rambute rada arang, nganti meh gundhul. Pokoke mesakake banget perawakane.
Ing dina sepisan munggah kelas kuwi, Bu Guru ndhawuhi saben murid kanggo ngenalkake awake dhewe-dhewe ing ngarep kelas. Saiki gilirane bocah anyar lanang mau ngenalake awake. Dheweke digeguyu kanca-kanca liyane, kelas dadi rame, bocah-bocah padha cekakakan. Bu Puji, wali kelasku ndhawuhi murid-murid meneng. Nanging ya dhasare bocah, tetep ora bisa meneng.Bocah-bocah ngempet ngguyu nganti rupane abang. Maksude kareben ora didukani Bu Guru.
Mlakune bocah anyar mau nganti keseret-seret. Wektu dheweke ngadeg sikile gemeter. Ing ngarep kelas, banjur dheweke ngenalke.
” Je . . jeneng . . jenengku Ad . . Adri ” jarene gagap. ” A . ... aku . . sa.. .saka . . ess . . SLB Harapan 1 .”
Kanca-kanca sing awit mau ngempet ngguyu, dadi ribut. Sanajan mengkono anggone Adri omong tetep diteruske. Ana rasa mesakake sumelip ing atiku.
Wacan ing dhuwur iku pethikan sawijining cerkak. Apa sing dikarepke cerkak?