Sega Cawuk kang windul rasane
Banyuwangi sak liyane sugih alam lan sugih budayane uga sugih aneka werna kulinere. Ana jajanan tradhisional, ana macem maceme sega kang cocog dinggo madhang wayah bengi, lan raina, sega tempong cocoge dipangan wayah raina, kang cocog dinggo wayah esuk salah sijine yaiku sarapan khas Banyuwangi kang diarani sega cawuk. Bedane sega tempong lan sega cawuk yaiku sega tempong duwe rasa pedhes lan seger, kadhung sega cawuk nduweni rasa manis kecut lan gurih.
Diarani sega cawuk merga njuwut kokohe dicawuk, biyasahe sak suguhan sega cawuk yaiku sega putih sak piring disiram telung macem jangan utawa kokoh antarane kokoh pindhang, pecel kelapa, lan ragi rujak. iwake endhog pindhang,pelasan, lan kerupuk kelethek, paran maning ditambahi sambel ranti tambah windul rasane.
Kadhung rika kepingin gawe pecel kelapa bahane sesigar kelapa , jagung rong tongkol dibakar, timun siji di rajang . Ragine kacang goreng sak gegem, kemiri petang iji, lobok jawa , lobok litik, bawang abang telung siyung, bawang putih rong siyung, uyah sak jumput gula rong sendhok. Carane nggawe, uyah, lobok,bawang abang, bawang putih kang wis digoreng mau digerus dadi siji diuled ambi parudan kelapa timun lan jagung terus disiram banyu panas.
Carane nggawe pindhang, bahane antarane ; iwak laut setengah kilo, gula telung sendhok, laos sak deriji, wadhung sak juring lan uyah sak jumput. Ngolahe gula digendam kadhung wis mateng disiram banyu sak siwur sampek gemulak, iwak lan bahan liyane dicemplungaken digodhog sampek empuk.
Sega cawuk iku mula cocog dienggo sarapan, rika bisa olah dhewek utawa marung nong warung mbok Mante Prejengan Rogojampi, mbok Sri Lateng utawa ring warung-warung sekitar taman Blambangan Banyuwangi.
Nurut wacan ring dhuwur apuwa gok diarani sega cawuk?
